Աշխարհասփիւռ սիրելի հայեր,

թանկագին հայրենակիցներ

Շնորհակալ եմ, որ ժամանակ էք գտնում եւ այցելում www.mindiaspora.am կայքը, տեղեկանալու համար Հայաստան-Սփիւռք գործակցութեան զարգացմանը, ՀՀ սփիւռքի նախարարութեան անելիքներին եւ Սփիւռքի առօրեային: Յուսով եմ ինտերնետի (համացանց) բոլոր հնարաւորութիւնները կ'օգտագործենք ՀՀ կառավարութեան կողմից Սփիւռքին միտուած քաղաքականութեան հիմնական դրոյթները Ձեզ հասցնելու համար:

Մենք կ'անենք ամէն ինչ, որ կայքում տեղ գտնեն հետաքրքիր եւ կարեւոր նիւթեր, տեղեկութիւններ, կը փորձենք տեղեկատուութիւն փոխանցել Հայաստանում եւ գաղթօջախներում տեղի ունեցող իրադարձութիւնների մասին:

Երախտապարտ կը լինենք, եթէ Ձեր կողմից արուեն առաջարկութիւններ եւ դիտողութիւններ կայքում տեղ գտած նիւթերի, ծրագրերի եւ տեղեկատուութեան վերաբերեալ:

Խնդրում ենք բարձրացնել հիմնախնդիրներ, անել հարցադրումներ ու առաջարկութիւններ, որոնք առնչւում են Հայաստան-Սփիւռք կապերին: Մենք պէտք է անենք ամէն ինչ, որպէսզի նպաստենք ազգի միաւորմանն ու Հայաստան-Սփիւռք յարաբերութիւնների ջերմացմանը, համազգային հարցերի շուրջ ողջ հայութեան համախմբմանը:

Դրանք կարող են հարստացնել, գեղեցկացնել եւ առաւել գրաւիչ դարձնել ՀՀ սփիւռքի նախարարութեան կայքը, ասել է թէ` Ձեր կայքը: Վստահ եղէք, որ լաւագոյն առաջարկներն անարձագանգ չեն մնայ:

Վստահ եմ, որ նաեւ աշխարհի տարբեր ծայրերում կայքեր ստեղծող շատ հայ մասնագէտներ իրենց ներդրումը կ'ունենան կայքն առաւել բազմաբովանդակ դարձնելու համար:

Յարգարժան բարեկամներ, հաւատացած եմ, որ մեր ինտերնետային կայքի խորագրերը ձեզ հնարաւորութիւն կը տան ծանօթանալու անուանի սփիւռքահայերի կեանքին ու գործունէութեանը, Հայրենիք-Սփիւռք գործակցութեան շրջանակներում իրականացուող ծրագրերին, ինչպէս նաեւ Սփիւռքում մեր հայրենակիցների խնդիրներին, կազմակերպութիւնների գործունէութեանը:

Սիրով եւ անկեղծ ակնկալիքներով`

ՀՀ սփիւռքի նախարար

Հրանոյշ Յակոբեան