Սպասուող իրադարձութիւններ

Յարգելի՛ հայրենակիցնէր,

Հայաստանի Հանրապետութեան սփիւռքի նախարարութիւնը Հայաստան-Սփիւռք գործակցութեան պետական քաղաքականութեան շրջանակում իրականացնում է «Մեր մեծերը» ծրագիրը, որը նուիրուած է մեր փառապսակ մեծերին: Այն առաջին անգամ մեկնարկել է 2009 թուականին եւ կրում է շարունակական բնոյթ:

Սոյն ծրագրի սահմաններում նախարարութիւնը 2009 թուականին կազմակերպել է հայ ժողովրդի մեծանուն զաւակներ, ՀՀ ազգային հերոսներ Վազգէն Վեհափառի, Շառլ Ազնաւուրի, Ալէք Մանուկեանի, Քըրք Քըրքորեանի, 2010 թուականին` Լազարեան եղբայրների, Պօղոս Նուբարի, Լեւոն Շանթի, Մխիթար Սեբաստացու, Վարդգէս Սուրէնեանցի, Միսաք Մանուշեանի, 2011 թուականին` Գարեգին Նժդեհի, Մոնթէ Մելքոնեանի, Պետրոս Դուրեանի, Ջիւանու կեանքին եւ հայրենանուէր գործունէութեանը նուիրուած միջոցառումների շարք:

2012 թուականին «Մեր մեծերը» ծրագրում ընդգրկուել են Սայաթ-նովայի (300-ամեակ), Յովսէփ Օրբէլու (125-ամեակ), Յովհաննէս Բաղրամեանի (115-ամեակ), Գառնիկ Զուլումեանի` Գառզուի (105-ամեակ) եւ Գարեգին Յովսէփեանի (145-ամեակ) անունները:

«Մեր մեծերը» ծրագրի նպատակներն են`

• հայրենանուէր անհատների ճանաչողութեամբ` սերնդի մէջ ազգային իրական արժէքների` հայրենասիրութեան, աշխատասիրութեան արմատաւորում եւ հայրենասէր մարդու նկատմամբ յարգանքի ձեւաւորում,
• հայապահպանութեան հիմնախնդիրների լուծմանը նպաստում,
• երիտասարդութեան լայն շրջանում ազգային արմատների եւ ինքնութեան ճանաչմանը նպաստում,
• պետականակերտման հոգեբանութեան արմատաւորում, ազգային ինքնութեան ամրապնդում եւ հայազօրացում, մատաղ սերնդի հայեցի դաստիարակութիւն:

Խնդրում ենք Ձեզ տարուայ ընթացքում կազմակերպել վերոնշեալ մեծերին նուիրուած միջոցառումներ եւ արդիւնքների մասին տեղեկացնել ՀՀ սփիւռքի նախարարութեանը (յօդուածներ, լուսանկարներ, տեսանիւթեր):

Ներկայացուած նիւթերը կը տեղադրուեն նախարարութեան կայքէջում եւ «Հայերն այսօր» պարբերականում (www.mindiaspora.am, hayernaysor.am):