Նորութիւններ

Սեպտեմբերի 8-ին ՀՀ Վարչապետ Տիգրան Սարգսեանը ՀՀ Կառավարութիւնում, ՀՀ սփիւռքի նախարար Հրանոյշ Յակոբեանի գլխաւորութեամբ, ընդունեց Կերպարուեստի գործիչների համահայկական համաժողովի մասնակիցներին:

Ողջունելով համաժողովականներին` Վարչապետն իր գոհունակութիւնը յայտնեց համաժողովին մասնակցելու եւ կառուցողական մօտեցումներ ցուցաբերելու համար:

«Մենք փորձում ենք համահայկական այսպիսի հաւաքների միջոցով համախմբել մեր արուեստագէտներին: Մեզ մտահոգող խնդիրներն աւելի ճիշտ է միասին քննարկել, որովհետեւ այդ խնդիրների մէջ պէտք է համատեղ որոշենք մեր առաջնահերթութիւնները եւ աւելի մեծ ուշադրութիւն դարձնենք խնդիրներին, որոնք նպատակայարմար է ներկայացնել պետութեան ուշադրութեանը` ակնկալելով լուծումներ»,- նշեց ՀՀ Վարչապետը:

Խօսքը փոխանցելով ՀՀ սփիւռքի նախարարին` Վարչապետը լսեց համաժողովի շրջանակներում իրականացրած աշխատանքներն ու միջոցառումները:

Համաժողովականների ընդունելութեան համար շնորհակալութիւն յայտնելով ՀՀ Վարչապետին` նախարար Յակոբեանը նշեց, որ համաժողովի շրջանակներում կազմակերպուել է 4 ցուցահանդէս, ընդունուել է կանոնադրութիւն եւ ստեղծուել յետագայ աշխատանքները համակարգող խորհուրդ:

Գերատեսչութեան ղեկավարը կարեւորեց համաշխարհային շուկայում հայաստանեան եւ Սփիւռքի արուեստագէտների աշխատանքները հաւուր պատշաճի ներկայացնելու հարցը: «Այստեղ մենք խնդիր ունենք արուեստաբանների պատրաստման: Արուեստի ակադեմիայում պէտք է աւելացնել Սփիւռքի ուսանողների քանակը», - ընդգծեց նախարարը` յաւելելով, որ նոյնքան կարեւոր է Սփիւռքի մեր արուեստագէտների աշխատանքների ցուցադրութիւնների ապահովումը Հայրենիքում: «Միմեանց ճանաչելու եւ տեղեկացուածութեան բացը լրացնելու լաւագոյն միջոցը արուեստագէտների պարբերականի եւ հայ արուեստի կայքի ստեղծումն է: Ես անսահման շնորհակալութիւն պէտք է յայտնեմ ՀՀ Կառավարութեանը` վիրտուալ թանգարան ստեղծելու` ՀՀ սփիւռքի նախարարութեան նախաձեռնութեանն աջակցելու համար»,- ասաց ՀՀ սփիւռքի նախարարը:

Այնուհետեւ համաժողովի մասնակիցները ներկայացրին իրենց յուզող հարցերը: Հայաստանի դիզայներների միութեան նախագահ Մարտին Կակոսեանը, շնորհակալութիւն յայտնելով ՀՀ սփիւռքի նախարարութեանը` կառուցողական համաժողով անցկացնելու եւ արդիական հնչեղութիւն ունեցող հարցերը վեր հանելու համար, ցանկութիւն յայտնեց` իրենց միութիւնը հայկական դիզայն կենտրոնի կարգավիճակում տեսնելու:

Գեղանկարիչ, մանկավարժ Հրազդան Թոքմաջեանը խօսեց Սփիւռքում բնակուող դեռահաս երեխաներին Հայաստան բերելու եւ վերջիններիս հետ մշակութային յատուկ ծրագիր իրականացնելու անհրաժեշտութեան մասին:

Լիբանանից արուեստի քննադատ Մովսէս Հերգելեանը խօսեց ազգային մշակութային քաղաքականութիւն մշակելու եւ այն հետեւողականօրէն իրականացնելու ժամանակի հրամայականի մասին:

Լսելով արուեստագէտների բարձրացրած հարցերը` Վարչապետն ըստ արժանուոյն գնահատեց վերջիններիս դերը հայ մշակոյթի շարունակականութեան գործընթացում:

Տիգրան Սարգսեանն ընդգծեց, որ Կառավարութիւնը պատրաստակամ է աջակցել արուեստագէտների կողմից հնչեցուած առաջարկութիւնների եւ նախաձեռնութիւնների մեծ մասի իրականացմանը:

Վարչապետը կարեւորեց նաեւ արուեստագէտների միջեւ մասնագիտական համագործակցութեան մթնոլորտի ձեւաւորումը եւ դրա հիման վրայ համահայկական ցանցի ստեղծումը:

«Ես համոզուած եմ, որ ՀՀ սփիւռքի նախարարութեան միջոցով, նման մասնագիտական համաժողովներ կազմակերպելով, մենք ճիշտ գործ ենք անում եւ բազմապատկում ենք մեր ազգի ներուժը», - եզրափակեց ՀՀ Վարչապետը: