Սիրելի աշխարհասփյուռ հայրենակիցներ,

Հպարտ եմ նորանշանակ կառավարության կազմում ստանձնելու Սփյուռքի նախարարի խիստ պատասխանատու և պատվաբեր պաշտոնը:

Պաշտոն, որն իմ ընկալմամբ, Հայաստան պետության անունից հատուկ առաքելություն ունի, նախևառաջ, ձեր բոլորի առջև՝ հայկական պետականության կողմից իր աշխարհասփյուռ զավակներին իրենց Հայրենիքում մեկտեղելու, և նրանց կյանքի, արարումի, զարգացումի ու այլ իրավունքների իրացման ամենալայն հնարավորություններն ընձեռելու հստակ տեսլականով:

Որպես մեր երկիր հեղափոխական փոփոխություններ բերող քաղաքական թիմի ներկայացուցիչ՝ հայկական Սփյուռքի հետ աշխատանքներում իմ քաղաքական գործունեության թիվ մեկ առաջնահերթությունն եմ համարում «Հայապահպանություն և Հայրենադարձություն» կոնցեպտի կյանքի կոչումը: Այսուհետ բոլորիս ջանքերը մեկտեղում ենք և նվիրվում այս գաղափարին առհավետ. աշխարհի բոլոր ծագերում վեր հանել հայրենազրկված մեր հայրենակիցների՝ ազգային ինքնության պահպանմանը սպառնացող մարտահրավերները, հաղթահարել դրանք և պատրաստել մեր հայրենակիցներին Մեծ Հայրենադարձության:

Այսօր արդեն միասին պետք է մեր բոլորի գործունեության հիմքում դնենք անառարկելի մի հրամայական. եթե ոչ Դուք, ապա Ձեր զավակները պետք է հասակ առնեն Հայաստանում:

Յուրաքանչյուրդ կրում եք Հայաստանը, նախևառաջ, ձեր մեջ, ապա նաև՝ ձեր համայնքներում, բայց այլևս «Հայաստանը» պետք է ապրեք Հայաստանում, Հայաստանը պետք է ապրեցնեք՝ ապրելով Հայաստանում, Հայաստանն այսօրվանից սպասում է ձեզ:

Իմ բոլոր մտածումների, նախաձեռնությունների և գործողությունների առանցքը ես կառուցելու եմ այս տեսլականը կյանքի կոչելու հրամայականից ելնելով:



Սիրում եմ ձեզ, սպասում եմ ձեզ, նայում եմ ձեր ուղղությամբ…
Սփյուռքի նախարար
Մխիթար Հայրապետյան