ՋԵՄՄԱ ԳՈՒՐԳԵՆԻ ԱՆԱՆՅԱՆ

Ծնվել է 09.06.1931թ. Իջեւանում, բանվորի ընտանիքում:

1947թ. ավարտել է տեղի միջնակարգ դպրոցը, 1951թ.` Երեւանի Խ. Աբովյանի անվան պետական մանկավարժական ինստիտուտը եւ աշխատանքի անցել Իջեւանի ութնամյա դպրոցում որպես ուսմասվար, ապա` տեղի միջնակարգ դպրոցում որպես հայոց լեզվի եւ գրականության ուսուցչուհի:

1957թ. ընտրվել է ՀԿԿ շրջկոմի պլենիումի անդամ, 1959թ.` ՀԿԿ շրջկոմի քարտուղար, 1965թ.` ՀԿԿ 2-րդ քարտուղար, 1977թ.` ժողովրդական դեպուտատների Իջեւանի շրջանային խորհրդի գործկոմի նախագահ:

1981թ. որպես պատգամավոր մասնակցել Է պետական հիմնարկների աշխատողների արհմիութենական համագումարին եւ ընտրվել վերստուգիչ հանձնաժողովի անդամ:

1983թ. ընտրվել Է ՀԿԿ Իջեւանի շրջկոմի 1-ին քարտուղար: 1990 թվականի սեպտեմբերից մինչեւ 1991թ. հունվարը ՀԿԿ շրջկոմի քարտուղարի պաշտոնի հետ համատեղել է նաեւ շրջխորհրդի գործկոմի նախագահի պաշտոնը: 1986թ. որպես պատգամավոր մասնակցել է ԽՄԿԿ 27-րդ համագումարին: 1988թ. մայիսին մասնակցել 19-րդ համամիութենական կուսակցական կոնֆերանսին, 1990թ. հուլիսին` ԽՄԿԿ 28-րդ համագումարին, որտեղ ընտրվել Է ԽՄԿԿ կենտրոնական կոմիտեի, նրա կենտրոնական վերահսկիչ հանձնաժողովի նախագահության անդամ:

1989թ. հունվարի 14-ին ՀԿԿ կենտկոմի բյուրոյի կողմից ենթարկվել է կուսակցական տույժի` նկատողություն` գրանցումով կուսակցական հաշվառման քարտում, շրջանում ազգամիջյան հարաբերությունների քաղաքական ղեկավարումը չապահովելու համար, որը հանգեցրել է դրանց ձեւախեղման եւ ադրբեջանական ազգության անձանց ինտենսիվ տեղափոխության:

1991թ. սեպտեմբերին որպես ՀՀ Ժողովրդական դեպուտատ. ՀԿԿ Իջեւանի շրջկոմի 1-ին քարտուղար եւ ժողովրդական դեպուտատների շրջխորհրդի գործադիր կոմիտեի նախագահ հանդես է եկել ԽՄԿԿ կենտկոմի գլխավոր քարտուղար Մ.Ս.Գորբաչովին ուղղված` նրա կողմից ղեկավարվող կուսակցության կենտկոմի, նրա քաղբյուրոյի, երկրի իշխանության պետական մարմինների ու կառավարության կողմից հանդես բերվող բացահայտ հակահայկական քաղաքականությունը դատապարտող հայտարարությամբ եւ դուրս եկել նախագահության կազմից:

1991. մայիսին Հայաստանի անկախ հանրապետության շրջանային խորհրդի անդրանիկ նստաշրջանում ընտրվել է շրջխորհրդի գործկոմի նախագահ, ուր աշխատել է մինչեւ 1996թ.: 1994թ. վերապատրաստվել է Վաշինգտոնի օրենքի միջազգային ինստիտում: 1996թ. փետրվարից մինչեւ հոկտեմբերի 23-ը աշխատել է որպես Տավուշի մարզպետի տեղակալ: 1996թ. հոկտեմբերի 23-ին ՀՀ վարչապետ Հրանտ Բագրատյանի թիվ 577 որոշումով ազատվել է զբաղեցրած այդ պաշտոնից: 1996թ. հոկտեմբերի 25-ից Ազգային ժողովի սոցիալական, առողջապահության եւ բնության պահպանության հարցերի մշտական հանձնաժողովի անդամ է եղել, 1998թ. հունիսից նույն հանձնաժողովի փոխնախագահը: 1997թ. ընդգրկվել է «Սոցիալական պետություն» պատգամավորական խմբի կազմում, որն ինքնալուծարվել է 1998 թվականի փետրվարին նույն ժամանակվանից եղել է «Երկրապահ» պատգամավորական խմբի կազմում:

1999թ. մայիսին նշանակվել է ՀՀ տարածքային կառավարման եւ օպերատիվ հարցերի նախարարի գլխավոր խորհրդական, 2000 թվականի ապրիլի 25-ին` ՀՀ առողջապահության եւ սոցիալական ապահովության նախարարի խորհրդական, հուլիսի 20-ից մինչեւ 2003թ. հունիսի 20-ը` ՀՀ սոցիալական ապահովության նախարարի խորհրդական, 2003թ. հունիսի 20-ից` ՀՀ ԱԺ «Ժողովրդական պատգամավոր» պատգամավորական խմբի գլխավոր մասնագետ:

1957թ. սկսած ընտրվել է ՀԿԿ շրջանային կոմիտեի պլենումի անդամ, 1960թ.` շրջանային խորհրդի բոլոր գումարումների պատգամավոր:

1985թ., 1990թ. եւ 1995թ. ընտրվել է ՀՀ Գերագույն խորհրդի եւ Ազգային ժողովի պատգամավոր, 1985թ. ընտրվել է ՀՀ Գերագույն Խորհրդի երիտասարդության գործերի մշտական հանձնաժողովի նախագահ:

Պարգեւատրվել է «Պատվո նշան» շքանշանով, ՀՀ Գերագույն Խորհրդի չորս պատվոգրերով, 2002թ.` ամերիկյան կենսագրական ինստիտուտի պատվո շքանշանով, արժանացել բազմաթիվ այլ խրախուսանքների:

Ամուսնացած է ունի մեկ տղա, հարս, թոռ, ծոռներ: