Հաճախ տրվող հարցեր
«Կրթության մասին» ՀՀ օրենքում փոփոխություն կատարվեց եւ ջավախահայ ուսանողների ուսման վարձը հավասարվեց ՀՀ քաղաքացիների ուսման վարձին: Սակայն բոլոր սփյուռքահայ ուսանողները հավասար են, ուստի` ՀՀ սփյուռքի նախարարությունը ՀՀ կառավարության առաջ հարց բարձրացրեց` փորձելով օրենքը տարածել Սփյուռքի մեր բոլոր հայրենակիցների վրա: Ի ուրախություն` նախարարության առաջարկին արձագանգեցին մի շարք համալսարանների ռեկտորներ: Նրանցից առաջինը ճարտարապետաշինարարական համալսարանի ռեկտոր պրն. Հ. Թոքմաջյանն էր, ով գիտական խորհրդում բարձրացրեց հարցը եւ սփյուռքահայ ուսանողների ուսման վարձավճարը հավասարեցրեց Հայաստանի ուսանողների վարձավճարներին: Նրա օրինակին հետևեցին նաև ուրիշները` մանկավարժական, Բրյուսովի անվան, տնտեսագիտական, Ագրարային, Գավառի եւ այլ համալսարաններ: Այսօր Հայաստանի պետական բուհերի ճնշող մեծամասնությունում ուսման վարձավճարը հայաստանցիների եւ սփյուռքահայերի համար հավասարեցված է:
