Շնորհավորանքներ

Սիրելի՛ հայրենակիցներ,

Մայիսը մեր ժողովրդի համար հաղթանակների ու բերկրանքի ամիս է, ու թեև այդ հաղթա­նակ­ները մեզ տրվել են գերմարդկային ջանքերի ու անդառնալի կորուստների գնով, սակայն դրա­նից հաղթանակի բերկրանքը ոչ միայն չի նվազել, այլև կարծես ավելի է իմաստավորվել: Եվ պատահական չէ, որ Երկրորդ համաշխարհային պատերազմը մենք անվանեցինք Մեծ Հայրե­նական: Մեր ժողովուրդը ազգովի ոտքի էր կանգնել երկիր հայրենին պաշտ­պանելու: 600 000 հայորդիներ մեկնեցին ռազմաճակատ, նրանցից կեսից ավելին իրենց կյանքը հոժարակամ դրեցին հայրենիքի փրկության զոհասեղանին, մյուսներից շատերը վերադարձան վիրավոր կամ հաշման­դամ: Երեք տասնյակ միլիոն նահատակների կողքին 300 000-ը կարծես թե մեծ թիվ չէ, սակայն մեր փոքրա­թիվ ժողովրդի համար դա հսկայական կորուստ էր, և չնայած հայկական լեռնաշ­խար­հը հեռու էր պատերազմի թատերաբեմից, ռումբերի պայթյունն ու պատերազմի արհավիրքներն այստեղ նույնքան զգալի էին, որքան  ռազմաճակատի առաջին գծում: Այո՛, պատերազմը մտավ նաև հայերիս տունը, որբացրեց մեր մանուկներին, այրիացրեց մեր երիտասարդ հարսներին, վշտով ու արցունքով լցրեց մեր մայրերի սրտերը: Պատերազմը հա­սավ նաև Թթու Ջուր, հավաքեց ու տարավ 273 քաջազուն երիտասարդներին, որոնցից 61-ը այլևս չվերադարձան: Տարիները չմեղմեցին կորստի ցավը, և մեր ժողովուր­դը իր սերն ու երախտագիտությունը դարձրեց քարե հուշարձան, ավելի հաճախ` աղբյուր-հու­շարձան, որոնք կանգնեցվում էին Հայաստանի տարբեր  բնակավայրերում` աստիճանաբար ժողովրդի համար դառնալով սրբատեղի:

Այսօր Հաղթանակը կերտողների, իրենց կյանքը զոհաբերողների հիշատակի հանդեպ հայ ժողովրդի երախտագիտության արտահայտման ավանդույթի շարունակության օրն է, և այդպիսի մի ուխտատեղի կդառնա նաև այս հուշարձանը, որ կանգնեցվում է Ռուսաստանի Դաշ­նության Նիժնի Նովգորոդ քաղաքի հայ համայնքի ղեկավար, Ձեր համագյուղացի Տիգրան Շահնազարյանի միջոց­ներով: Ես մեծ խորհուրդ եմ տեսնում այն բանում, որ հայրենիքից հեռու բնակվող հայը հուշար­ձան է տեղադրում իր ծննդավայրում: Դա վառ ապացույցն է այն բանի, որ աշխարհա­սփյուռ հայն այսօր շարունակում է արմատներով կապված մնալ իր հայրենիքին: Հենց սրանում է մեր ուժը: Եվ պատահական չէ, որ Հանրապետության նախագահ Սերժ Սարգսյանը Հայաստան-Սփյուռք գործակցությունը բնորոշում է ՙՀայաստանը մի՛ պետություն է Սփյուռքով և բոլորովին այլ պետություն` առանց Սփյուռքի՚, և համայն հայության ներուժն է մեր երկրի մրցակցային առավելությունը:

Դիմում եմ բոլոր նրանց, ում հոգին վառվում է հայկականությամբ, բոլոր նրանց, ում սիրտը հպար­տությամբ է լցվում հայ մարդու հաջողությամբ, ում միտքը զբաղված է Հայաստանով, նաև նրանց, ով հավատում է մայր Հայաստանի հավերժությանը: Թող այս հուշարձանը, որ մեր հարգանքի տուրքն է այն հայ քաջորդիների հիշատակին, ովքեր իրենց մահով հաղթեցին մահը, միաժամանակ դառնա Հայրենիք-Սփյուռք համագործակցության կենդանի առհավատչյան:

Մեր խոնարհումն ու խորին հարգանքը Մեծ հայրենականում զոհված թթուջուրցիներին:

Փառք ու պատիվ պատերազմի վետերաններին, սատարենք նրանց ամեն ինչում և ամենուր, շրջապատենք հոգատարությամբ:

Հայրենիքին նրանց անմնացորդ նվիրումն էր, որով մկրտված հաջորդ սերունդը կերտեց Արցախյան հաղթանակը, որի միայն մեկ դրվագը` Շուշիի ազատագրումը, այս օրերին սրտի տրոփյունով նշում է ամեն հայ:

Արժանի լինենք հայ ազատամարտիկների սխրանքին:

Ընդունեք իմ ջերմ շնորհավորանքն ու բարեմաղթանքները Մեծ հաղթանակների կապակցութ­յամբ:

ՀԱՐԳԱՆՔՈՎ`

ՀՐԱՆՈՒՇ ՀԱԿՈԲՅԱՆ