Շնորհավորանքներ
Սփյուռքի հայկական ուսումնական դպրոցների հարգարժան տնօրեններ, ուսուցիչներ, սիրելի ծնողներ և սաներ, իմ աննման հայեր և հայուհիներ, սիրով և ջերմությամբ եմ շնորհավորում Ձեզ նոր ուսումնական տարվա կապակցությամբ և մաղթում հետաքրքիր, հաջողություններով լի ուսումնական տարի:
Իմ շնորհավորանքն ու շնորհակալությունն եմ հղում հատկապես Սփյուռքի հայկական դպրոցների բոլոր ուսուցիչներին, ովքեր իրենց ուսերին են վերցրել հայապահպանության և ազգային արժեքների փոխանցման պատասխանատու գործը:
Այսօր շարունակ զարգացող աշխարհում, իրոք, առավել ևս կարևորվում են գիտելիքն ու կրթությունը, որ բոլոր ժամանակներում եղել են լույսը մտքի և հոգու, պայմանը մարդկային կյանքի առաջընթացի և զորացման:
Սիրելի դպրոցականներ, անհրաժեշտ է, որ Դուք նախևառաջ Ձեր սեփական լեզուն, մշակույթն ու պատմությունն իմանաք, հպարտանաք մարդկային քաղաքակրթության մաս կազմող մեր հարուստ անցյալով և միշտ հիշեք, որ Ձեր Հայրենիքը Հայաստանն է, և որ նրա ապագան պետք է կերտվի Հայաստանում ու նրանից դուրս ապրող երիտասարդ սերունդների նվիրական գործով, նրանց մտքի տաղանդի ուժով, ստեղծագործ, արարող աշխատանքի շնորհիվ:
Իմ սիրելի աղջիկներ ու պատանիներ, ուստի` ինչ էլ որ դառնաք, հիշեք, որ Ձեր ապագան Հայաստանն է, ու Ձեր Մայր-Հայրենիքը` օրավուր վեր հառնող Հայաստանի Հանրապետությունը:
Հայաստանը Ձերն է, իսկ դուք` Հայաստանինը:
ՀՀ սփյուռքի նախարար
Հրանուշ Հակոբյան
